滑滑海南雞飯 中式食譜

滑滑海南雞飯
滑滑海南雞飯


上次食咗個好好食嘅海南雞飯外賣,引發起我自己整😆其實上次整已經係三年前!日日都有太多餸想煮,成日諗唔起呢個😎今次整得超級滑!主要秘訣都係個樣,要用浸焗方法去煮熟隻雞!煮亦都一定要用細火!煮好之後要浸凍水,雞皮就會好脆身,等到隻雞降溫同表面乾身先開始切!自己整雖然有點煩,但係整到一隻滑雞充滿滿足感😜♥️🥰



▶️斑蘭葉必定要打上結,味道才會特別容易滲出來!
▶️切雞時盡量確保拿刀的手不要接觸雞塊,否則隻手會變得好油,拿不穩把刀😂切雞去骨可以參考YouTube一些教學片段😜

材料:
✨海南雞✨
雞 1隻
香茅 4支
斑蘭葉 4片
乾蔥 6粒 (去皮)
南薑 2塊
黃薑粉 1茶匙
冰塊 適量
水 適量

✨雞油飯✨
白米 1.5米杯
煮過雞的湯 1.5米杯
斑蘭葉 2片
香茅 1支
蒜 4瓣 (拍扁)
南薑 2塊
乾蔥 2粒 (切半)
雞脂肪/油 適量

✨辣椒醬✨
兩條指天椒、一湯匙蒜蓉和一茶匙薑蓉弄碎,然後加入一個青檸汁

✨薑蓉✨
2湯匙薑蓉、1/2茶匙五香粉、1/2茶匙鹽和1/4茶匙糖攪拌均勻,然後倒入兩湯匙滾油

✨甜豉油✨
2湯匙老抽、2茶匙生抽和1湯匙糖細火煮至糖溶化

海南雞做法:
1) 全雞洗淨,先將多餘的雞脂肪切出,留起備用 ,切去雞腳,把雞身的內臟徹底清走,雞頸開一個洞
2)香茅輕拍後切段,班蘭葉打結,黃薑粉加少少水攪拌均勻
3) 除雞以外,所有材料加入水中煲滾後繼續煲5分鐘,水的份量要足夠蓋過全隻雞
4) 把雞放入水內5秒,拿起,再放入,重複3次。此動作是想熱水從雞頸流入雞身,令體肉都受熱均勻
5) 細火上蓋煮6分鐘,然後熄火繼續上蓋浸40分鐘,煮雞水留起煲飯用
6) 可用竹籤在雞腿位插入測試熟度,沒有血水滲出便代表已熟,然後把雞放在冰水中15分鐘,拿起讓雞皮風乾
7) 之後斬件及去骨即成

雞油飯做法:
1) 燒紅鑊,轉小火下雞脂肪榨出油,把脂肪拿走,加入其餘所有材料炒勻
2) 將炒過的材料放入飯煲,再下一比一的煲過雞的水作煲飯用,照一般電飯煲程序煲飯即成

#betiskitchen雞#betiskitchen中式

肉碎蒸滑蛋 中式食譜

肉碎蒸滑蛋
肉碎蒸滑蛋


Grandma’s recipe👵🏻超簡單好送飯的一道菜!有時怕就咁一個蒸蛋會唔夠飽,加埋肉碎向上面就一定夠!💛💛💛免治豬肉盡量切碎一點口感更佳!

蒸滑蛋不失敗秘訣
🔸蛋:水 比例 1:2
🔸一定要用保鮮紙或鍚紙蓋住蒸
🔸蛋液過篩 盡量戮穿蛋液上的氣泡
🥚火候我用中火大火之間🤣我發現太大火會易蒸到老

材料:
雞蛋 2隻
水/雞湯 約250ml (1份蛋汁:2份水)
免治豬肉 150g
蔥花 2湯匙
滾油 & 蒸魚豉油 適量

調味料:
蠔油 1湯匙
生抽 1湯匙
老抽 1 茶匙
麻油 1茶匙
糖 1/2茶匙
水 4湯匙
生粉水 (1湯匙水+1茶匙生粉先攪拌均勻)

做法:
1) 雞蛋打勻,不用打發太耐,以免起泡,加入適量鹽和2份水/雞湯拌勻,用隔篩濾去雜質及氣泡
2) 蒸碟倒入蛋汁,鋪上錫紙,水大滾放入,隔水蒸10-12分鐘
3) 熱鍋下油,加入肉碎炒至變色!再加入蔥花、蠔油、生抽、老抽、麻油和糖炒至均勻上色!最後加入水和生粉水煮至汁濃便可關火
4) 把肉碎倒在蛋上,再加入適量滾油和蒸魚豉油即成

#betiskitchen中式#betiskitchen蛋

無蛋Tiramisu 甜品食譜

無蛋Tiramisu
無蛋Tiramisu


Simple version! 100%成功簡單版✨唔知有冇人同我一樣,會突然間好想好想食Tiramisu😆自從結婚整完自己個結婚蛋糕之後,就開始討厭焗蛋糕…😅呢個甜品勁方便♥️ 超快完成無需使用焗爐!
無蛋係因為我不太喜歡食生雞蛋生蛋白的蛋糕🤪用忌廉代替雞蛋都好好食💕呢個係比較滑身質地的tiramisu✔️

▶️如果搵唔到咖啡酒,可以用60ml咖啡加40ml Rum/Marsala酒代替!
▶️淡忌廉一定要在雪櫃拿出來後便立刻打發!注意容器不可有任何水份,而不夠凍亦會打發不起的!大約需要 5-6分鐘😍

🤍15cm x 15cm份量🤍
材料:
淡忌廉 250ml
意大利軟芝士 Mascarpone Cheese 300g
砂糖 80g
手指餅 20條
咖啡酒 100ml
可可粉 20g

做法:
1)意大利軟芝士忌廉從雪櫃拿出,放回室溫30分鐘
2)打發淡忌廉,從雪櫃拿出來,倒入容器中,用電動打蛋器慢速打一分鐘左右直至有泡沫,然後調整到中速打約三分鐘,最後用高速打發1-2分鐘直至末端變得企身便可,放回入雪櫃備用
3)意大利軟芝士加入砂糖,打蛋器用慢速至均勻軟滑,分3次加入已打發好的忌廉
4)手指餅每條每邊浸在咖啡酒中1秒,然後鋪在餅模底部,再放上芝士忌廉,重複做多一層,用刮刀打頂層的芝士忌廉輕輕鋪平
5)放入雪櫃雪4小時以上,之後在表面灑上可可粉即成

#betiskitchen甜品

黑松露蘑菇湯 西式食譜

黑松露蘑菇湯
黑松露蘑菇湯


Super creamy🥺食譜之前打過不過係全素cream version!每次晚餐都覺得要飲返個湯先至圓滿😜西餐有時都唔例外😗呢隻黑松露醬係我用咗咁耐都覺得最好用嘅一隻💕菇粉和日本菇是我額外加上的,可以省卻😗



▶️可以加入不同香草如parsley和thyme, 但係我太懶無加🤣
▶️我今次就咁用水去煲,無加到雞湯或者蔬菜煲湯,味道都好好
▶️加入薯仔係因為我鍾意有啲粉粉地嘅感覺,都係optional

材料:
啡菇 300g
白菇 200g
乾菇 少量 (optional)
洋蔥 半個
薯仔 20g (少少便可)
蒜頭 1瓣
素牛油 20g
水 / 蔬菜高湯 700ml
忌廉 50ml
黑松露油 2茶匙
黑松露醬 2茶匙
海鹽 適量
黑椒 適量

做法:
1. 菇類切片,乾菇菌浸15分鐘後洗淨,洋蔥切粒,蒜頭切碎,薯仔切粒
2. 熱鍋下牛油,加入蒜蓉和洋蔥粒炒2分鐘,然後再加入薯仔和菇類炒至軟身(約3分鐘),之後倒入水或蔬菜高湯,慢火煮20分鐘!
3. 熄火!可以先拿起少少蘑菇做裝飾,然後用手動攪拌器把所有材料打碎!之後重新開火,轉小火加入黑松露醬和忌廉,煮3分鐘後加入海鹽和黑椒調味!熄火後加入黑松露油,再加少少忌廉同菇在表面做裝飾便成!

#betiskitchen湯水#betiskitchen西式

南乳煎雞翼 中式食譜

南乳煎雞翼
南乳煎雞翼


👵🏻’s recipe! Encored for many times already😚So juicy💕(second video it’s so hot almost hurt my fingers😂)勁簡單,諗唔到煮咩煮呢個啱晒!我真係好鍾意食雞翼架😎腐乳係發酵左嘅豆腐!顏色係白色即係豆腐本身嘅顏色🤍而南乳就係加咗红麴的腐乳,所以顏色係紅色!南乳整體上沒有腐乳咁鹹,帶有甜香♥️

▶️煎雞翼一定要用中細火煎!但好多時如果就咁煎,表面煎燶咗,但啲肉都未熟!我會煎到兩邊金黃之後,加少少水上蓋煮至水收乾,令到雞翼中心受熱均勻,然後再轉中火把雞翼兩面繼續煎至金黃!

雞翼 10隻

醃料:
南乳 50g
腐乳 20g
糖 1茶匙
麻油 1茶匙
生抽 1茶匙
老抽 1茶匙
米酒 1湯匙
胡椒粉 1/2茶匙

做法:
1) 所有醃料攪拌均勻,盡量壓爛南乳和腐乳,雞翼放入醃料醃至小一小時,醃過夜更佳
2) 煎之前可以抺走雞翼上部分的醃料
3)熱鑊下油,用細火先煎香雞翼2面至金黃色約1-2分鐘,加入30ml水,小心彈油!上蓋煮5分鐘,此時水份應該會揮發走,開蓋,轉中火,把雞翼的兩邊繼續煎多1-2分鐘,煎至金黃色即成

#betiskitchen中式#betiskitchen雞

日本蠔白酒忌廉意粉 西式食譜

日本蠔白酒忌廉意粉
日本蠔白酒忌廉意粉

第一次試呢隻來自瀨戶內海的日本桶蠔,結果非常飽滿鮮味!滿意滿意♥️🇯🇵本身未洗都幾乾淨,所以清理方面唔會好困難!加入白汁忌廉意粉超夾!super creamy and juicy! 不過加入意粉之後要小心攪勻,因為蠔比較脆弱易破爛!

▶️都可以用冰鮮蠔🥰如果怕有腥味,可以清洗過後,用少少檸檬汁同鹽去醃一醃先煮
.
.
材料: (2人份)
意粉 150g
蠔 8隻
乾蔥頭 3粒
蘑菇 10粒
牛油 15克
雞湯 200ml
白酒 100ml
忌廉 200ml
Parsley 少許
鹽和黑胡椒 適量

做法:
1) 先洗蠔,把蠔放在碗中,用生粉拌勻、沖水清洗2-3次!如果把腥可以加入少許檸檬汁和鹽醃一醃
2) 乾蔥切碎,蘑菇切半,意粉跟包裝減2分鐘煮至al dente
3) 熱鑊下牛油爆香乾蔥蓉約2分鐘,再加入蘑菇炒至蘑菇約3分鐘,然後倒入白酒讓酒精揮發,再倒入雞湯煮滾後,加入蠔大火煮4分鐘,把意粉加入攪拌均勻,再加入忌廉轉細火煮2分鐘
4)下少許黑椒和鹽調味,再加入parsley即成

琥珀合桃 甜品食譜

琥珀合桃
琥珀合桃


👦🏻話佢細個同屋企人向嘉麟樓食飯之前最鍾意食呢個小食喎😂其實之後佢有時都會整,但係我冇post過🤣呢個係佢👵🏻教佢整架!其實都好易整!出面買都幾貴,自己整可以一次過整大量,再放入樽仔或者保鮮袋收藏,得閒當小食食下✌🏻

PS: 製作過程啲相影得唔係好清楚,廢事阻住大師傅開工啦😌

▶️用油炸係最傳統嘅做法!做出嚟嘅效果亦都係最脆身!用焗爐都得!不過效果一定有少少分別😶

▶️如果用焗爐請先把芝麻和合桃攪拌均勻,焗爐用150度焗20分鐘!

材料:
琥珀合桃 1斤
水 150ml
片糖 100g
白糖 30g
麥芽糖 80g
芝麻 20g

做法:
1) 芝麻白鑊炒香
2) 水加入半茶匙鹽,再加入合桃煮3分鐘以去苦澀味,瀝乾備用
3) 鍋中加入水,再加入麥芽糖、片糖和白糖小火煮至糖完全溶化及開始有糖漿狀態!加入合桃,再用中火不斷攪拌至每一粒合桃都鋪上糖漿!
4) 熱鍋加入適量的油,用中小火把合桃炸約3分鐘至琥珀色後拿起,立即加入芝麻攪拌均勻!
5) 鋪平待凉後便可食用或儲存!

#betiskitchen中式#betiskitchen甜品

北海道毛蟹瑩光魷魚飯 日式食譜

北海道毛蟹瑩光魷魚飯
北海道毛蟹瑩光魷魚飯


Happy Friday🦀這個都幾trouble但真係super yummy!!!! 材料已經加哂分✌🏻上次整過一次係用熟蟹肉同熟螢光魷魚!我覺得效果OK成本底啲但係始終唔夠鮮味!今次特登買咗隻日本北海道空運直送新鮮毛蟹同新鮮螢光魷魚!super yummy omg 雖然好鬼煩要手拆蟹肉又要炮製班魷魚,(真心嬲整到😂) 但係食完之後是感動的😂2個材料都好多膏😋♥️追求簡單版本可以用已拆肉熟蟹肉同熟螢光魷魚再加用電飯煲煲飯都得😜



▶️螢光魷魚可以睇 @rays_platesss YouTube 有條片好詳細咁介紹點樣處理!我都係跟佢!第一次整咋☺️😜

▶️毛蟹一斤,大火反轉身蒸15分鐘左右!之後拆蟹肉先係戲肉😩不過算啦太好食係要辛苦啲🥺

▶️飯個湯底用蒸完蟹啲蟹汁+ 木魚高湯加啲蟹殼入去煲!再加少少醬油!成件事係想食到海鮮嘅鮮味!

材料:
毛蟹 1隻
螢光魷魚 250g
三文魚子 適量
Parsley / 大葉 適量 (裝飾)
米 2米杯
木魚高湯 400ml (10g木魚碎加400ml水煲5分鐘)
日式醬油 1湯匙

做法:
1) 毛蟹反轉身放在碟上,大火蒸15分鐘!留起蒸蟹汁!蟹拿出來拆肉!小心蟹殼十分鋒利🥲去除蟹掩和蟹腸,再用剪刀在關節位拆下蟹腳和蟹鉗,再剪開蟹腳拆出蟹肉!然後打開蟹蓋,先去除中間的蟹胃和蟹咀,留蟹蓋備用!蟹身在中間切開,去除蟹腮,拆肉!蟹肉備用,蟹殼留起!

2) 螢光魷魚用鉗子在中間背部開一個小洞,去掉背後的軟骨,之後再去掉眼睛和嘴巴!去掉眼睛的時候要小心一點,盡量不要弄破眼睛,否則有些黑色汁會走出來又要洗一洗😂

3) 10g木魚碎加入400ml水,再加入和蟹殼煲5-10分鐘,隔走蟹殼和木魚碎,成煲飯上湯!

4) 米加入蒸蟹汁&高湯 (米1:水份1 比列),再加入日式醬油,細火加蓋煮15-20分鐘至飯乾身!如果中途太乾身但啲米都未熟就加多少少高湯!之後再放入螢光魷魚煮3分鐘,再加入蟹蓋和蟹肉在表面煮多3分鐘,最後加入三文魚子和大葉裝飾即成!

#betiskitchen海鮮#betiskitchen日式

花甲粉絲煲 中式食譜

花甲粉絲煲
花甲粉絲煲


Super super easy and yummm✌🏻粉絲同金菇索晒啲汁😗超級簡單!👦🏻大讚💕呢排情迷煲仔菜😂今次呢隻豆瓣醬幾好食!不過今日淨係買到小花甲😅呢排相熟海鮮檔都入唔到靚貨🥲

▶️花甲煮的途中會出水,所以一開始不用下太多水!個人喜歡這個花甲煲做到比較乾身的效果!
▶️花甲可以煮之前1小時放室溫!加入少少鹽放入水浸去沙!

材料:
花甲 1斤
粉絲 1包
金菇 1包
蒜蓉 2湯匙
蔥花 2湯匙
辣椒碎 1茶匙
水200ml
芫荽和蔥花 裝飾

調味料:
豆瓣醬 1湯匙
生抽 2湯匙
蠔油 1湯匙
麻油 1茶匙
糖 1/2茶匙
鹽 1/2茶匙

做法:
1) 粉絲放入熱水浸10分鐘,金菇切去根部,弄散
2) 熱鍋下油,加入蒜蓉、辣椒碎和蒽花爆香,再倒入調味料爆香!放上金菇和粉絲,再倒入水煮滾!
3) 加入花甲,上蓋中火煮6分鐘或煮至開口,表面灑上蔥花和芫荽即成

#betiskitchen中式#betiskitchen海鮮

西京燒鱈魚 + 清蒸鱈魚 (鱈魚二食)

西京燒鱈魚 + 清蒸鱈魚 (鱈魚二食)
西京燒鱈魚 + 清蒸鱈魚 (鱈魚二食)


好耐無出過魚類食譜🤣因為基本上我平時都係食清蒸魚😆 鱈魚在我心中價錢和味道都屬於是高端魚類,味道非常特別細膩,個種魚油甘甜味無其他魚取代到!今次整西京燒同清蒸都非常之好食!👶🏻鐘意食清蒸♥️💕鱈魚我在街市冰枱買,鐘意切幾厚都得✌🏻我返屋企自己再切走中間大骨,再切一半!(美觀一點和吃得方便一點!但煎的時候會比較易爛,要小心一點喔)

1) 西京燒鱈魚

▶️西京燒表面好易整,但要整到日本餐廳個種焦香乾身感唔易,上次去京都食懷石料理問了師傅秘訣
💛要有焦糖感覺就要最後塗上少少味醂再燒多陣
💛焗爐易焗到出水,instead可以平底鑊抹油再加塊牛油紙慢火煎就會更易令魚有焦金色又唔濕身
▶️醃至少一晚,二晚就更佳。

材料
銀鱈魚 /白鱈魚 2塊
西京味噌(白味噌) 100g (一定要用白味噌否則普通味噌會好咸!)
清酒 20g
醬油 10ml
糖 30g

做法:
1) 銀鱈魚洗淨吸乾水份,沿著圓骨位切成2件(美觀一點)
2) 西京味噌、清酒及糖攪勻,小火煮到粘身再加入醬油拌匀,待涼後地醬塗上銀鱈魚的上下,包上保鮮紙,放入雪櫃醃至少1日
3) 銀鱈魚取出,抹去銀鱈魚表面的味噌醬
4) 於平底鑊上塗上油,再加牛油紙慢火煎至二面焦黃,反轉時要小心點否則好易散開,最後再輕輕塗上一層味醂再燒多陣即成!

2) 清蒸白鱈魚

直接大火蒸8-10分鐘!倒走蒸後碟上的魚水,放上蔥花!淋上滾油和蒸魚豉油即成!

#betiskitchen魚#betiskitchen中式#betiskitchen日式