超級好食！花膠、臘腸再加煎過嘅瑤柱絲！Perfect Match! 飯焦好正💖花膠我去鴨脷洲大街買，臘腸用咗安記，再加隻日本蛋！呢個煲仔飯我自己諗出嚟嘅配搭，出面街都冇食過😗Inspired by myself🙂🙂🙂野生鮑魚汁係之前朋友向澳洲送俾我😭向香港我都未搵到！呢個飯真係好好食！5分鐘清哂😆💞

▶️如果煮到最後都覺得冇飯焦，可以試吓細火繼續煮5分鐘再焗5分鐘！飯焦呢樣嘢，真係好睇每個屋企嘅爐頭🥲好難一概而論🔥
▶️無鮑魚汁可以用蠔油代替
▶️菜心分開煮最後先放入去會冇咁容易變老
▶️發花膠details可睇返我之前的post！向我個blog到search💖

材料: (2人用)
花膠 1大塊/ 2-3條
米 2米杯
水 2米杯
鮑魚汁 1茶匙
瑤柱 2大粒
臘腸 2條
蛋 1隻
菜心 2條
甜豉油 適量
油 1茶匙

花膠調味料:
蔥 2條
蠔油/ 鮑汁 1湯匙
雞湯 150ml
糖 1茶匙
老抽 1湯匙

做法:
1) 花膠浸1晚，之後用薑加小小米酒，煮一煲滾水再放入花膠，蓋上煲蓋，中火滾約3分鐘左右關火，花膠繼續蓋上蓋浸半日！
2) 瑤柱浸淋之後用油煎香，臘腸放入滾水煮3分鐘，切片備用，菜心用滾水煮熟
3) 花膠發好後，切粗條，煲中下油爆香蒜頭和蔥，快手下花膠輕炒後下雞湯和其他調味料，轉小火炆煮20分鐘
4) 鍋底抹1茶匙油，米洗淨後加入同等份量的水，再加多1茶匙鮑汁攪拌一下，蓋上鍋蓋以中火煮至鍋蓋緣有蒸汽冒出，再轉小火繼續煮約10分鐘至收水，之後放上臘腸、花膠、瑤柱碎，繼續煮5分鐘，再加入雞蛋煮多3分鐘，放上菜心，倒上甜豉油即成

⭐️如果想有飯焦可以最後轉中細火煮多5分鐘再熄火焗5分鐘⭐️

諗唔到煮乜就會煮雞翼😅前一晚醃定入味好多，第二晚直接入焗爐就搞掂，記得最尾轉高溫焗脆個皮✨用蒜片唔會咁易焗燶！加埋檸檬去焗個味好清新！檸檬最好切薄啲💛

▶️放入焗爐淨係放啲雞翼好了，唔好倒埋啲醃料汁入去焗，如果唔係焗唔到乾身唔會皮脆架！

材料:
雞翼 10隻
蜜糖 2湯匙
檸檬 1個 (切片)

醃料:
蒜片 2湯匙
生抽 1湯匙
老抽 1湯匙
蜜糖 1湯匙
鹽 1/2茶匙
黑椒 1/2茶匙
油 1湯匙
糖 1茶匙
米酒 1/2湯匙

做法:
1) 雞翼解凍後洗淨，瀝乾水份，加入醃料醃最少2小時，過夜更入味
2) 預熱焗爐至 180°C
3) 焗盤上鋪上牛油紙，放入雞翼、蒜片和檸檬180°C焗十分鐘，反轉雞翼再180°C焗十分鐘，搽上蜜糖再220°C焗五分鐘，再加黑椒即成

#betiskitchen西式#betiskitchen雞

⭐️福建菜式⭐️之前向餐廳食過之後一直念念不忘！咁啱響街市見到有黃蟶子賣！就諗起可以整呢道菜👌🏻超簡單勁好食！但有個麻煩位就係煮熟完啲蟶子之後要逐隻將中間黑色污糟野整走😵

材料:
黃蟶子 半斤
蛋 4隻
紅尖椒 半條 切碎
乾蔥頭 1粒 切碎
鹽 1/2茶匙
紹興酒 1茶匙
蔥花 2湯匙
蒸魚豉油 適量
白胡椒粉 適量

做法:
1) 滾水加入紹興酒，把黃蟶子加入，大火煮到開口後，立即拿起過凍水！之後把肉取出！再逐條將中間的黑色污物去掉！
2) 蛋加入鹽攪拌均勻！
3) 平底鑊加入2湯匙油，再加入1湯匙蔥花、紅尖椒和乾蔥碎炒香，倒入蛋漿攪拌均勻，之後再加入蟶子，用中火把蛋煎熟，在表面加上餘下蔥花、適量的豉油和白胡椒粉即成

#betiskitchen中式#betiskitchen蛋#betiskitchen海鮮

刈包配紅燒肉就食得多，今次試下用嘉頓芝麻軟包🤍淡淡嘅芝麻香配上口感軟熟麵包，原條風琴式設計可在中間放入超好食的紅燒肉！好夾💖 焗一焗就外脆內軟，細細塊搣開就食得夠哂方便！而且呢個芝麻軟包塗蒜蓉醬仲可以整蒜蓉包！超好食👌🏻

材料:
嘉頓芝麻軟包 1包
連皮五花腩 250g
薑 8片
蔥 4棵 (切段)
芫荽 適量
紅尖椒 適量
花生碎 適量

調味料:
紹酒 1湯匙
冰糖 1湯匙
生抽 2湯匙
老抽 1湯匙
水 300ml

做法:
1. 水中加入一半的薑和蔥煮滾，再加入整塊五花腩煮5分鐘，拎出沖水至冷卻，之後切成1cm x 1cm 方塊，豬皮上的毛可事先叫肉檔去掉
2. 鍋中下少少油，爆香剩下的薑和蔥，把豬腩肉方塊加入，兩面煎至微黃色，迫出油份，之後倒去多餘的油份！倒進酒，再加入其他調味料！煮滾後轉小火炆約45分鐘-1小時至豬肉軟稔，再轉大火煮5分鐘把醬汁煮至厚身
3. 嘉頓芝麻軟包切開，再在每邊塗上牛油，包中間放上紅燒肉，放入焗爐160度焗5分鐘！之後再放上芫荽、紅尖椒和花生碎即成

#betiskitchen包#betiskitchen中式#betiskitchen豬
#嘉頓芝麻軟包#因為soft所以梳乎#自制梳乎滋味

唔好以為整一隻雞係好複雜！其實好簡單！放入調味料細火浸煮之後拎返出嚟就食得😋❤️遲吓做冬可以煮呢個菜式比家人食！玫瑰露酒我鍾意煮嗰陣已經加！因為我唔鍾意太重酒味💖如果鐘意重酒味可以最尾焗雞再加多少少😴話說我煮完隻雞💁🏽‍♀️姐姐話想幫我斬雞😆然後我先發現佢係唔識斬雞…😅

💖滑雞tips💖
➡️全程用細細火浸煮！雞要細火煮先滑！
➡️煮之前先用滾水浸雞皮每邊30秒，再立刻放入凍水，雞皮冷縮熱漲後，之後煮就唔會咁易破皮
➡️雞頸開個洞！等煮個陣啲汁可以流過雞身入味！

材料:
雞 1隻
薑 6片
乾蔥頭 6粒
蔥 1大扎(切段)

調味料:
玫瑰露酒 20ml
生抽 150ml
老抽 50ml
水 400ml
冰糖 2湯匙

做法:
1) 將雞洗淨，雞頸剪一個洞，清理好內臟，剪走雞腳！煮一鍋滾水後，放入雞把雞皮每邊浸30秒，拿起，立刻放入凍水中，冷卻備用
2) 所有調味料、薑、乾蔥頭和蔥加入鍋中煮滾後，轉細細火，加入雞，頭3分鐘不斷把調味汁倒在雞身上，之後上蓋最細火煮15分鐘，再返轉另一邊煮15分鐘，熄火焗15分鐘！用筷子刺一下雞脾位，不出血水即熟
3) 完成後取出雞待稍涼後切件，倒入適量煮雞汁淋在雞上，再加上蔥花便成

#betiskitchen中式#betiskitchen雞

Inspired by 之前食懷石料理的菜式🤪呢個LC 18cm就係我人生第一個LC煲！用咗7年了😋飯類菜式我最鐘意用LC，因為可以鎖住熱力同保溫極強！食材可以均勻受熱！煮完之後再上蓋焗就好容易可以整到飯焦🤪個飯真係太好食同好易整！唔使10分鐘俾👦🏻食哂💞

▶️煲飯的湯要用木魚高湯，我用快速木高湯包嚟煲個湯底好方便！放入去水到煲5分鐘就完成♥️日式超市亦都有木魚湯粉！或直接用木魚碎去煲個湯底都好簡單！
▶️蛋絲係optional，純粹擺咗靚啲😅就咁平底鑊煎蛋再切絲就得！
➡️我用了2種菇，大家都可以用自己喜歡的菇

材料:
日本米 2米杯
木魚高湯 2米杯 （和米 1:1比例)
日式急凍鰻魚 1條
日本本菇 50g
日式醬油 1湯匙 
味醂 1湯匙
清酒 1茶匙

Optional:
三文魚子，大葉切碎，蛋絲

做法:
1) 米先洗乾淨，本菇去尾部，拆散備用
2)鍋中加入米，柴魚高湯、醬油、味醂和清酒攪拌均勻，然後再加入本菇攪拌均勻，開中火，湯滾後轉細火加蓋煮15-20分鐘或至飯乾身，再轉大火1分鐘後熄火，焗5分鐘 
3) 鰻魚解凍後！平底鑊下油，小火把鰻魚煎返熱！後然將鰻魚切大粒！
4) 把鰻魚粒鋪在飯上面，然後再灑上大葉，細火加蓋煮1分鐘後，再加入三文魚子和蛋絲即成

#betiskitchen日式#betiskitchen魚

Last post of the Italian cooking series🇮🇹 雖然我發現大家都係鐘意Asian recipes 多啲🥲Anyways 呢個dish健康簡單！平時蒸魚太悶但又想食魚可以諗下呢個！仲可以食埋蔬菜💞師奶mode為咗換泊車買咗呢條意大利海鱸魚，平時向街市買條新鮮都得🤪

💚蔬菜只係參考！可以用鍾意嘅蔬菜去焗💚

材料:
海爐魚 1條
Rosemary 2湯匙
蒜頭 6瓣
檸檬 1個切片
Parsley碎 適量
橄欖油 適量
新薯、甘筍仔、彩色車厘茄、菠菜、蘑菇 適量
海鹽 1茶匙

做法:
1) 魚劏好洗淨抹乾備用！肚內放入1片檸檬和蒜頭，表面灑上1茶匙海鹽和1湯匙Rosemary！醃15分鐘備用！
2) 新薯加入適量橄欖油、1湯匙Rosemary和適量海鹽！放入焗爐180度焗30分鐘！
3) 菠菜用油炒熟
4) 魚、其他雜菜和檸檬，灑上適量橄欖油，放在牛油紙上，用170度焗20-25分鐘即成！之後可以放上parsley裝飾💚

#betiskitchen西式#betiskitchen魚

White truffle season🇮🇹! 向 @mercatogourmet_hk 買咗新鮮白松露！上年整黑松露！今年試吓白松露！真係香好多❤️❤️❤️ 呢間係我最鍾意嘅意大利材料店😍平過某超市😜不過缺點就係唔係好就腳！再用咗新鮮闊條麵同taleggio cheese！但簡單啲用cream cheese都得🤍 意粉好簡單整就得！唔使整色整水😂因為主要係想食白松露原味👌🏻
.
.
▶️唔好唔記得買可以刨松露嘅刨😅我個個廢廢地，刨得有啲衰😒我呢粒30g😌
.
.
材料:
白松露 適量
意粉/闊條麵 200g
Cream Cheese 50g
牛奶 50ml
蛋 1隻
海鹽 適量
黑椒碎 適量

做法:
1) 燒滾熱水加1湯匙鹽，意大利粉按包裝指示減2分鐘來煮至Al Dente質感，撈起瀝乾備用
2) Cream Cheese 和牛奶細火煮溶，再加入意粉攪拌均勻！加少少鹽和黑椒！一隻蛋打發好，意粉煮好後立即拿起，放入另一個碗中和雞蛋攪拌均勻！
3) 意粉放在碟上，再加入白松露片即成💞

#betiskitchen意粉#betiskitchen西式

複製cheesecake factory版本😆🤍好易整！蒜蓉粉係精粹！如果唔想特登買就唯有加多啲蒜蓉😂雞肉用咗日本雞柳👌🏻整埋個BB無鹽少芝士版本俾👶🏻食！一家大細都可以一齊食💞👦🏻👶🏻又清碟❤️❤️嚟緊幾個post都會係西餐！等大家可以預備12月👌🏻🎄

材料:
蝴蝶粉 200g
雞柳 4條
急凍青豆 30g
紅椒 1/4個 (切粒)
啡菇 3粒 (切片)
蒜粉 1湯匙
蒜片 1湯匙
牛油 20g
忌廉 150ml
Mozzarella Cheese 50g
巴馬臣芝士碎 20g
Parsley碎 適量
海鹽和黑椒 適量

做法:
1) 燒滾熱水加1湯匙鹽，蝴蝶粉按包裝指示減2分鐘來煮至Al Dente質感，撈起瀝乾備用！留少少煮意粉嘅水！
2) 將雞柳洗淨再切中粒，然後用廚房紙巾抹乾，2邊加少少鹽和黑椒！之後燒熱鑊，加入橄欖油，中細火煎至2邊微金黃，盛起備用
5) 細火下牛油，加入蒜片炒香，然後再加入青豆、紅椒碎和菇片炒2分鐘！加入蒜粉、雞肉和蝴蝶粉和少少煮意粉水炒勻！再加入忌廉和Mozzarella Cheese煮至醬汁濃稠！最後加入parsley碎、鹽和黑椒碎，上碟再加上巴馬臣芝士碎即成💞

#betiskitchen意粉#betiskitchen西式