海蝦櫻花蝦黃金炒飯 中式食譜

海蝦櫻花蝦黃金炒飯
海蝦櫻花蝦黃金炒飯


My boys’ fav fried rice👦🏻👶🏻! 純分享下我個人經驗,家庭式小技術😌今次用咗新鮮游水海蝦!加少少櫻花蝦同埋菜心🤲🏻我煮炒飯比較喜歡先把蛋和飯攪拌均勻!今次又係用咗蘭王蛋,隻色美美的🫶🏻今次見啲海蝦蝦頭好多膏,炒飯之前特登爆香左啲蝦膏先開始炒❤️‍🔥

▶️ 炒飯切忌用鑊鏟壓飯,一定要用推的方法去慢慢把飯推散!

▶️ 沒有用隔夜飯,因為好多時會雪到太硬,即日煲的飯放在室溫放涼一會便可以,我覺得效果更佳

▶️ 熱鍋熱油有耐性炒!令飯的蒸氣揮發,就會做到粒粒分明效果!

▶️ 切忌一次過倒入大量飯去炒,因為會令到鍋中太多飯,沒有足夠的散熱空間,不能炒到乾身效果

▶️ 用電飯煲煲飯,米和水比例可以用1:0.9,後會比較乾身,更易炒

▶️ 我多數用泰國金鳳米,飯身比較煙靭
.
.

材料:
海蝦 500g
櫻花蝦 30g
米 1米杯
菜心 6條
蛋 1隻
蔥花 適量

做法:
1) 1米杯的米用電飯煲煮成白飯,煮好後放在室溫15分鐘 (煮飯的水的份量,可以比平時少10%)
2) 海蝦去頭備用,蝦身放入滾水中,大火煮熟,拿起去蝦殼備用
3) 菜心只取菜心莖,切小粒備用
4)雞蛋打發好,加入1/4茶匙鹽和1茶匙油,再倒入白飯中,攪勻!
5)大火熱鑊下1湯匙油,(如蝦頭有蝦羔可以加入蝦頭爆香後拿起),把已混入蛋汁的飯倒在中間等30秒,之後開始不斷炒和推,要有耐性,保持大火!炒約5分鐘後加入菜心粒,繼續炒多3分鐘至乾身和粒粒分明!之後加入海蝦和櫻花蝦炒勻,加少許鹽調味即成

#betiskitchen中式#betiskitchen海鮮

滑蛋牛肉飯 中式食譜

滑蛋牛肉飯
滑蛋牛肉飯


Easy comfort food! English recipe at the bottom.牛肉部位我多數買新鮮牛冧肉,可以叫街市牛肉店幫手切埋,方便快捷😹 要整到滑牛肉第一其實要肉質好、部位對,第二就係要逆紋切,等三就係醃肉方法!炒滑蛋之前已經介紹過,唔再多講,可以睇返滑蛋蝦仁個post♥️
▶️一定要跟足以下醃肉次序!煎牛肉唔好多手反來反去,否則好易水汪汪🥺





材料:
牛肉 200g
雞蛋 4個
牛奶 20ml (可省略)
蔥粒 少許
鹽 少許

醃料:
蠔油 1湯匙
生抽 1湯匙
糖 1茶匙
胡椒粉 1/2茶匙
生粉 1湯匙 + 水 2湯匙 成生粉水
油 1湯匙

做法:
1) 牛肉切片,加入蠔油、生抽、糖、胡椒粉攪拌均勻!之後再加入生粉水攪拌30秒至均勻及牛肉吸收水份,最後加入油醃15分鐘!
2) 中火下1-2湯匙油,加入牛肉,先鋪平煎好1邊約1分鐘,再反轉另一個,牛肉開始轉色的時候,可開始爆炒一下,拿起備用!
3) 把蛋打入大碗裡打,加入少許牛奶和鹽拌勻
4) 大火加1-2湯匙油在鑊中,等到油好熱,倒進蛋汁和牛肉,轉小火再炒蛋,見底部蛋汁開始凝固就手快地用鑊鏟由底鏟上面,之後關火,利用餘溫重覆炒多幾下後便成,免炒得太熟,加蔥粒即成

Ingredients:
Beef 200g
Egg 4
Milk 20ml (optional)
Spring onion
Salt to taste

Beef marinade:
Oyster sauce 1tbsp
Soy sauce 1tbsp
Sugar 1tsp
White Pepper 1/2tsp
Potato Starch 1tbsp mix with 2tbsp water
Oil 1tbsp

1. Cut beef into slice, marinate the beef according to the marinade list sequence, mix until the beef absorb all the marinade, set aside for 15 mins.
2. In a bowl, add in eggs, milk and salt; whisk until smooth.
3. On a pan, add one tbsp of oil and heat over medium heat, pan fry for the beef for 1min on each side, then transfer to a plate and set aside.
4. On a pan, add one tbsp of oil and heat over high heat, add the egg mixture and the beef, when the edge of the egg starts to form, scrape your spatular along the bottom, turn off the fire and using the remaining heat to keep cooking the egg until the egg mostly set but not fully.
5. Add spring onion and sweet soy sauce, serve with rice!!

#betiskitchen中式#betiskitchen牛#betiskitchen蛋

荷葉蒜蓉鮑魚黄金飯 中式食譜

荷葉蒜蓉鮑魚黄金飯
荷葉蒜蓉鮑魚黄金飯


For my boy’s bday⭐不過其實佢生日仲未到預祝咋🤭今次用咗南非鮑魚,再用油炸香咗啲櫻花蝦放向面!炒飯其實好易,大火同有耐性係咁推,直到飯的水份無咗就會粒粒分明跳晒舞🤣蛋要炒之前同白飯攪拌均勻,再有耐性炒就得!💕但話說今次太趕時間😵相都無乜點影,飯就求其炒咗幾下收工😂要煮餐好飯真係唔應該趕頭趕命😅下次認真啲♥️♥️♥️

▶️用乾荷葉其實個味仲香同易買好多!無蒸籠就咁包向碟上蒸就得!乾荷葉可在藥材鋪或街市雜貨店買到!買一張無洞完整的!$2一張😛

▶️如果怕太大力擦鮑魚會令到肉質不夠爽口,可以先把鮑魚煮一煮才開始清潔!但我還是喜歡先清洗,之後煮30秒起肉,才再擦一擦一些邊位,因為煮過的鮑魚太大力擦好容易會爛🐦大家鍾意邊個方法都得♥️

材料:
乾/鮮荷葉 1塊
鮑魚 6-8隻
熟白飯 1.5飯杯
蛋 2隻
蔥花 適量
櫻花蝦 2湯匙 (optional)

蒜蓉汁:
蒜蓉 1湯匙
雞粉 1/4 茶匙
鹽 1/4茶匙
糖 1/2茶匙,
熟油 2湯匙

做法:
1) 荷葉洗一洗之後,放入熱水中加鹽灼一灼變軟,整乾後鋪在蒸籠上備用
2) 蒜蓉汁材料攪勻備用
3) 雞蛋打發好再加1/4茶匙鹽在白飯中,攪勻!大火熱鑊下油,把已混入蛋汁的飯倒在中間等30秒,先開始不斷炒和推!千其唔好壓!要有耐性!慢慢炒就會等到乾身同粒粒分明!炒好後將飯倒在荷葉上!
4) 鮑魚用牙刷刷乾淨!之後放入熱水煮30秒!再拿起沖凍水,用匙羹去鮑魚殼!之後去膽、腸和咀,再輕力擦一擦!
5) 鮑魚放在飯上,在鮑魚上淋上蒜汁,蓋上荷葉,可用牙籤固定,再蓋上蒸籠!滾水大火蒸6分鐘,蒸好之後再撒上蔥花和用油煎過的櫻花蝦!如果鐘意可淋上甜豉油!

#betiskitchen中式#betiskitchen海鮮

滑滑海南雞飯 中式食譜

滑滑海南雞飯
滑滑海南雞飯


上次食咗個好好食嘅海南雞飯外賣,引發起我自己整😆其實上次整已經係三年前!日日都有太多餸想煮,成日諗唔起呢個😎今次整得超級滑!主要秘訣都係個樣,要用浸焗方法去煮熟隻雞!煮亦都一定要用細火!煮好之後要浸凍水,雞皮就會好脆身,等到隻雞降溫同表面乾身先開始切!自己整雖然有點煩,但係整到一隻滑雞充滿滿足感😜♥️🥰



▶️斑蘭葉必定要打上結,味道才會特別容易滲出來!
▶️切雞時盡量確保拿刀的手不要接觸雞塊,否則隻手會變得好油,拿不穩把刀😂切雞去骨可以參考YouTube一些教學片段😜

材料:
✨海南雞✨
雞 1隻
香茅 4支
斑蘭葉 4片
乾蔥 6粒 (去皮)
南薑 2塊
黃薑粉 1茶匙
冰塊 適量
水 適量

✨雞油飯✨
白米 1.5米杯
煮過雞的湯 1.5米杯
斑蘭葉 2片
香茅 1支
蒜 4瓣 (拍扁)
南薑 2塊
乾蔥 2粒 (切半)
雞脂肪/油 適量

✨辣椒醬✨
兩條指天椒、一湯匙蒜蓉和一茶匙薑蓉弄碎,然後加入一個青檸汁

✨薑蓉✨
2湯匙薑蓉、1/2茶匙五香粉、1/2茶匙鹽和1/4茶匙糖攪拌均勻,然後倒入兩湯匙滾油

✨甜豉油✨
2湯匙老抽、2茶匙生抽和1湯匙糖細火煮至糖溶化

海南雞做法:
1) 全雞洗淨,先將多餘的雞脂肪切出,留起備用 ,切去雞腳,把雞身的內臟徹底清走,雞頸開一個洞
2)香茅輕拍後切段,班蘭葉打結,黃薑粉加少少水攪拌均勻
3) 除雞以外,所有材料加入水中煲滾後繼續煲5分鐘,水的份量要足夠蓋過全隻雞
4) 把雞放入水內5秒,拿起,再放入,重複3次。此動作是想熱水從雞頸流入雞身,令體肉都受熱均勻
5) 細火上蓋煮6分鐘,然後熄火繼續上蓋浸40分鐘,煮雞水留起煲飯用
6) 可用竹籤在雞腿位插入測試熟度,沒有血水滲出便代表已熟,然後把雞放在冰水中15分鐘,拿起讓雞皮風乾
7) 之後斬件及去骨即成

雞油飯做法:
1) 燒紅鑊,轉小火下雞脂肪榨出油,把脂肪拿走,加入其餘所有材料炒勻
2) 將炒過的材料放入飯煲,再下一比一的煲過雞的水作煲飯用,照一般電飯煲程序煲飯即成

#betiskitchen雞#betiskitchen中式

櫻花蝦臘腸煲仔飯 黄金飯焦技巧 成功率高 中式食譜

櫻花蝦臘腸煲仔飯
櫻花蝦臘腸煲仔飯


今次想主打講飯焦!頭幾次煮建議用簡單啲嘅材料如臘腸、臘肉或潤腸等!如果整雞或者肉餅,因為會出水,亦會怕食材煮得太熟,會更難控制飯焦的成功率😗今次用咗傳統煲仔飯瓦煲!其實本身冇諗住買,因為屋企已經有太多煲😂不過街市雜貨店見到$28實在太平😅雖然唔耐用,但係好有風味,推薦♥️👦🏻投訴話個煲太細個,佢可以食2煲😆the best claypot rice from myself ever🖤🥸Cooking video on my instagram.


事先聲明,飯焦好視乎爐頭!未必一次成功!但整幾次一定掂❗️
▶️ 飯焦原理就好似用油煎米餅,有油而飯又煮到乾身,再大火少少就做到
▶️ 但秘訣就係點樣唔好太大火煮到黑哂,靠聞下個味同聽下聲,當然仲有經驗!如果聞到有燶味就係有問題,要收手細火啲😂
▶️個煲蓋唔好成日開嚟開去!後期要將個煲打斜,不同方向對住個火煮,咁就可以連個邊都有飯焦!
▶️我無浸米,洗一洗就煮,洗完米一定要盡量整乾水先!如果唔係水份就會唔啱比例!米用泰國米最易煮到乾身粒粒分明,我用泰國金鳳口感煙韌♥️
.
.
材料: (2人用)
臘腸 2條
櫻花蝦 30g
米 2米杯
水 2米杯 (1:1 比例)
甜豉油 適量
蔥花 適量

做法:
1. 鍋底抹1茶匙油,米洗淨後加入同等份量的水,蓋上鍋蓋以中火煮至鍋蓋緣有蒸汽冒出,再轉細火繼續煮約10分鐘至收水,之後放上臘腸、繼續小火煮10分鐘
2. 期間可以炒香櫻花蝦備用
3. 向煲邊圍圈倒上1湯匙油!火力轉中火!將個煲打斜向不同方位煮1-2分鐘左右(總共6分鐘)!應該會聽到節節聲同聞到香味!關火!把臘腸取出,切粒,之後和櫻花蝦一起放返入個煲到,冚蓋焗3-5分鐘,加上蔥花和豉油即成!(如果呢一刻撩個邊都係無飯焦就落多少少油繼續重複煮)

#betiskitchen中式#betiskitchen豬

超鮮甜無水卜卜蜆鍋 中式食譜

超鮮甜無水卜卜蜆鍋
超鮮甜無水卜卜蜆鍋

超鮮甜無水煮卜卜蜆鍋🇲🇴𝒞𝓁𝒶𝓂𝓈 𝓅𝑜𝓉
.
.
30秒學識整🫢15mins done! 超級簡單超級好食!最後個圖係一滴水都冇落過嘅效果,充滿鮮味,全部都係蜆和蔬菜的精華😜放向底的白蘿蔔和娃娃菜吸收晒!LC Buffet 每次整”無水煮”都大成功😎如果無可試下用淺身煲,一定要淺身有蓋,才可令蒸氣回流入煲底做到出水效果!如果都無就加100ml水去煮!今次隻沙白超級肥美💖$40斤!完全無沙!

.
.
▶️買水份高啲的白蘿蔔鋪底!就可以做到無水煮效果!如果真係驚唔夠可以落少少水!

▶️沙白/白蜆比較合適!新鮮度好重要!一定唔可以係死蜆,否則會有臭味同不能吐沙🫣我亦會觀察養蜆的水是否清澈,同最好在買開而可靠的魚檔多數唔會出事😎
.
.
材料:
蜆 1-1.5斤
白蘿蔔 半條
娃娃菜 2棵
蒜蓉 2湯匙
蔥花 2湯匙
蠔油 1湯匙
麻油 1茶匙

做法:
1) 蜆放鹽水浸1小時吐沙,洗淨備用
2) 白蘿蔔去皮切粗條,娃娃菜切去根部,平均鋪在鍋底,再把蜆排好,可以先排外圍,再由外至內排好
3) 表面灑上其他材料,上蓋,中火煮6-8分鐘,或蜆開口即成

#betiskitchen中式#betiskitchen海鮮


花膠臘腸鮑汁煲仔飯 中式食譜

花膠臘腸鮑汁煲仔飯
花膠臘腸鮑汁煲仔飯


超級好食!花膠、臘腸再加煎過嘅瑤柱絲!Perfect Match! 飯焦好正💖花膠我去鴨脷洲大街買,臘腸用咗安記,再加隻日本蛋!呢個煲仔飯我自己諗出嚟嘅配搭,出面街都冇食過😗Inspired by myself🙂🙂🙂野生鮑魚汁係之前朋友向澳洲送俾我😭向香港我都未搵到!呢個飯真係好好食!5分鐘清哂😆💞


▶️如果煮到最後都覺得冇飯焦,可以試吓細火繼續煮5分鐘再焗5分鐘!飯焦呢樣嘢,真係好睇每個屋企嘅爐頭🥲好難一概而論🔥
▶️無鮑魚汁可以用蠔油代替
▶️菜心分開煮最後先放入去會冇咁容易變老
▶️發花膠details可睇返我之前的post!向我個blog到search💖



材料: (2人用)
花膠 1大塊/ 2-3條
米 2米杯
水 2米杯
鮑魚汁 1茶匙
瑤柱 2大粒
臘腸 2條
蛋 1隻
菜心 2條
甜豉油 適量
油 1茶匙

花膠調味料:
蔥 2條
蠔油/ 鮑汁 1湯匙
雞湯 150ml
糖 1茶匙
老抽 1湯匙

做法:
1) 花膠浸1晚,之後用薑加小小米酒,煮一煲滾水再放入花膠,蓋上煲蓋,中火滾約3分鐘左右關火,花膠繼續蓋上蓋浸半日!
2) 瑤柱浸淋之後用油煎香,臘腸放入滾水煮3分鐘,切片備用,菜心用滾水煮熟
3) 花膠發好後,切粗條,煲中下油爆香蒜頭和蔥,快手下花膠輕炒後下雞湯和其他調味料,轉小火炆煮20分鐘
4) 鍋底抹1茶匙油,米洗淨後加入同等份量的水,再加多1茶匙鮑汁攪拌一下,蓋上鍋蓋以中火煮至鍋蓋緣有蒸汽冒出,再轉小火繼續煮約10分鐘至收水,之後放上臘腸、花膠、瑤柱碎,繼續煮5分鐘,再加入雞蛋煮多3分鐘,放上菜心,倒上甜豉油即成

⭐️如果想有飯焦可以最後轉中細火煮多5分鐘再熄火焗5分鐘⭐️

蟹粉花膠撈麵 中式食譜

蟹粉花膠撈麵
蟹粉花膠撈麵


上年整過蟹粉粉皮,今年試另一樣🍂仲記得前年有咗👶🏻!無得食又好想食😅今次用咗6隻大閘蟹🦀5.5-6両左右一隻!多謝👦🏻幫我拆蟹肉蟹羔🧡上年向蘇淅會食過💞今年憑記憶再整返同一個菜😆不過佢係用粗麵!我個人鐘意用幼麵多啲!蟹黃汁十分掛身!但係真係好肥🐷要努力跑返多幾次🙈蟹粉我覺得自制都係一個樂趣,上海食品店買到嘅蟹粉唔平,始終成本高又要好多人手😬



⭐️蟹粉撈面⭐️
材料:
大閘蟹 6隻 (6両)
紫蘇葉 6張

▶️大閘蟹放上紫蘇葉蒸好之後拆肉拆羔

材料: (2人用)
蟹粉 200g
麵 2個

薑蓉 1湯匙
油 3湯匙
雞粉 1茶匙
紹興酒 1茶匙
鎮江醋 1茶匙
鹽 少許
胡椒粉 少許
蔥花 適量

做法:
1) 麵加水煮至軟身,隔走水份!留少少煮麵水備用!
2) 熱鍋下油,下薑蓉爆香,再下蟹粉炒2分鐘至蟹油出,再加入調味料再煮多2分鐘便可加入麵拌勻,再加上蔥花和煮好的花膠即成

⭐️花膠⭐️

花膠 1塊
蒜頭 2粒
蔥 2條
蠔油/ 鮑汁 1湯匙
雞湯 200ml
糖 1茶匙
老抽 1湯匙

做法:
1) 花膠浸1晚,之後用薑加小小米酒,煮一煲滾水再放入花膠,蓋上煲蓋,中火滾約3分鐘左右關火,花膠繼續蓋上蓋浸半日左右就會發到好大!一開始煮嗰陣會縮水㗎!唔好嚇親!之後浸就會變返大!
2)花膠發好後,煲中下油爆香蒜頭和蔥,快手下花膠輕炒後下雞湯和其他調味料,轉小火炆煮15-20分鐘,之後切粗條即成

#betiskitchen中式#betiskitchen海鮮

蕃茄芝士焗豬扒飯 中式食譜

蕃茄芝士焗豬扒飯
蕃茄芝士焗豬扒飯


<改良版> 港式美食!買咗來自澳洲的 @riverviewfarms_hongkong 豬扒!肉質好Juicy同好鬆軟!我最憎食硬嘅豬扒🤣今次我完全冇出動過鬆肉錘或刀背拍鬆!就咁煎完出嚟已經好滑!一啲都唔會鞋😜😜Highly recommended! 而家向 @hkgreendotdot 做緊 $100 2件優惠!好抵食!去到8月24日咋❤️❤️蕃茄用咗意大利蕃茄再配日本煎蛋🧡💛


▶️豬扒鬆軟方法:
⭐️加蛋白和生粉去醃!唔好加太多鹽去醃要用豉油!
⭐️醃之前用鬆肉錘或刀背拍鬆!
⭐️一開始煎要用大火
.
.
材料:
豬扒 250g
生粉 2湯匙
洋蔥 半個
蕃茄 2個
水 200ml
茄汁 4湯匙
糖 1湯匙
鹽 1/2茶匙
Mozzarella芝士碎 適量
煎太陽蛋 1隻 (optional)

豬扒醃料:
蛋白 半隻
生抽 1茶匙
胡椒粉 1/4茶匙
糖 1/2茶匙
鹽 1/2茶匙
生粉 1湯匙
水 1湯匙

炒飯:
冷飯 2大碗
雞蛋 1隻
鹽 1/4茶匙

做法:
1) 豬扒醃料攪拌好,豬扒用刀背或鬆肉錘輕輕拍鬆,加入醃料醃至少半小時
2) 蕃茄切角和洋蔥切粗條備用
3) 把蛋打好,倒入白飯中攪拌均勻,熱鍋下1湯匙油,大火加入飯,不斷用鑊鏟推啲飯,(約要5-8分鐘) 直到飯炒到乾身和粒粒分明,加少許鹽備用
4) 豬扒醃好後,沾上輕薄的生粉,熱鍋下油,大火把豬扒煎至兩面金黃,拿出備用
5) 同一個鍋中下油,加入洋蔥炒香,再加入蕃茄炒2分鐘,然後倒入茄汁和水,再加入鹽和糖,中火煮約5-8分鐘至汁濃即成
6) 焗盤先鋪上飯,放上豬扒(可先切粗條再放入),再倒入煮好的蕃茄汁,表面放芝士,180c焗10分鐘即成!

#betiskitchen中式
#betiskitchen豬

高湯象拔蚌 中式食譜

高湯象拔蚌
高湯象拔蚌


2星期前煮🥺上個星期因為榮貓出咗事無post到😞好彩而家食返嘢又好似睇得返少少!繼續努力!

向街市買了一條象拔蚌自己開!簡單用個木魚昆布高湯煮一煮嚟食!再沾少少辣豉油!so good💕💙用木魚碎加一條昆布煮個湯底就OK!

自己開象拔蚌其實好易架咋!首先向二邊切一切,令到肉離殼先!把肉取出,切走個膽!準備熱水,把洗乾淨的象拔蚌放進去15秒後取出!就好容易整走個皮!把象拔蚌放在砧板上,中間切開,但唔好切斷!之後就可以切片啦😝💙 (去YouTube 睇下片lol,無想象中咁難)

#betiskitchen中式#betiskitchen海鮮#betiskitchen火鍋