2021年第一個post！來一個正正的鮑魚菜式☺️我都係第一次炆乾鮑，所以買咗隻平平地測試測試下，呢到$70 1隻左右😝效果都不錯！不過成件事真係要幾日架😅 我再加埋花膠同冬菇入去😙
發花膠可以睇返我之前個post 🖤
▶️炆完鮑魚個湯可以留返做上湯或飲都得！如果覺得太油，可以雪一晚之後，油就會凝固浮面，咁就可以整走上面層肥油
▶️如果用明火怕痴底要加竹笪防黐底！我用真空煲炆就無加到！用真空煲不時煲滾佢，再放返內膽入就OK! 好方便❤️
▶️可以用牙籤向鮑魚中間吉一吉，如果可輕易穿過就係炆好！
材料:
乾鮑 6隻
排骨 1斤
雞 1隻
雞腳 8隻
金華火腿 3片
調味:
蠔油 1湯匙
老抽 1湯匙
冰糖 1湯匙
炆鮑魚的上湯 150ml
生粉水 1湯匙
.
.
做法:
1) 乾鮑用水浸過面，放入雪櫃，每日換一次水，浸2日，之後再煲一鍋水，要可以蓋過所有鮑魚，連鮑魚煲滾後熄火，上蓋，室溫焗過夜！
2) 之後拿出洗一洗淨，再剪開鮑魚咀，將內裡的腸臟及污衊拿出，用手按一按鮑魚中間，如果仲係硬要再浸！浸透的話應該係會有彈性！
3) 其他材料落凍水，之後煲滾5分鐘後拿起洗淨，出水備用！排骨白鑊煎至金黃！
4) 煲底先放上竹笪，(竹笪買返黎要用滾水煮一煮消毒)，再放上排骨，一半雞腳，鮑魚，一半雞腳，最上層放雞，倒入水蓋過所有材料！
5) 煲滾後轉細火炆3小時，再熄火焗至溫度降至唔熱，再開火炆3小時，如此類推！大約炆2日！最後先落金華火腿去炆最後一回！
6) 拿起鮑魚，放置等15分鐘令鮑魚收水，再加入調味料的材料，細火煮15鐘，再加入生粉水埋獻即成
#betiskitchen中式#betiskitchen海鮮
