就快新年🧧今年時間好趕…聖誕完咗冇耐就新年😅新年出返個黃金湯意頭菜食譜😋食中餐總係覺得冇湯飲唔安樂😂超喜歡飲湯💓呢隻急凍澳洲青邊鮑向街市凍肉檔買$500左右！花膠就係之前買落的花膠筒超靚🫶🏻這個湯材料比較貴，唔可以成日煲😂不過大時大節就非常之適合，一家人食得開心最重要🤭青邊鮑煲完湯之後切片食非常鮮甜！值回票價😌
▶️發花膠我鐘意用快捷方法！煮之前一日開始浸，煮當日的早上煲一煲佢，再浸一個下午就得🤪
▶️青邊鮑必須要徹底解凍，建議煮的前一晚從冰格放回雪櫃正常格解凍！切勿用急速沖水解凍方法😅而青邊鮑飛水必須要凍水落，如果滾水落會好易縮水！
▶️雞湯連皮煲係一定會有好多油向面！飲之前盡量隔走佢就得！唔連皮煲係無咁香架😆
材料: (6碗)
雞 1隻
雞腳 6隻
豬骨 300g
金華火腿 30g
花膠 6-8條
青邊鮑 1隻
淮山 15g
無花果/蜜棗 4粒
水 3000ml
做法:
1) 花膠清水浸1晚，之後用薑加小小米酒，煮一煲滾水，再放入花膠，蓋上煲蓋，中火滾約3分鐘左右關火，花膠繼續蓋上蓋浸半日
2) 雞切開4份，凍水落雞、雞腳、金華火腿和豬骨，水煮滾後繼續煮5分鐘飛水去除污糟和血水，然後拿起備用！
3) 淮山浸15分鐘，青邊鮑解凍之後用牙刷清潔邊邊，去除腸臟，凍水落青邊鮑，水煮滾後繼續煮3分鐘飛水去腥味，然後拿起備用！
4)鍋中加入所有材料(除了花膠)，大火滾5分鐘後轉小火煲2.5小時，然後再加入花膠煮多30分鐘，加少許鹽調味即成
