粥粉麵飯/火鍋 – 5 頁 – Beti's Kitchen 簡易食譜分享

荷葉蒜蓉鮑魚黄金飯中式食譜

6 八月, 2022粥粉麵飯/火鍋、鮑魚、海鮮、中式發表留言

For my boy’s bday⭐不過其實佢生日仲未到預祝咋🤭今次用咗南非鮑魚，再用油炸香咗啲櫻花蝦放向面！炒飯其實好易，大火同有耐性係咁推，直到飯的水份無咗就會粒粒分明跳晒舞🤣蛋要炒之前同白飯攪拌均勻，再有耐性炒就得！💕但話說今次太趕時間😵相都無乜點影，飯就求其炒咗幾下收工😂要煮餐好飯真係唔應該趕頭趕命😅下次認真啲♥️♥️♥️

▶️用乾荷葉其實個味仲香同易買好多！無蒸籠就咁包向碟上蒸就得！乾荷葉可在藥材鋪或街市雜貨店買到！買一張無洞完整的！$2一張😛

▶️如果怕太大力擦鮑魚會令到肉質不夠爽口，可以先把鮑魚煮一煮才開始清潔！但我還是喜歡先清洗，之後煮30秒起肉，才再擦一擦一些邊位，因為煮過的鮑魚太大力擦好容易會爛🐦大家鍾意邊個方法都得♥️

材料:
乾/鮮荷葉 1塊
鮑魚 6-8隻
熟白飯 1.5飯杯
蛋 2隻
蔥花適量
櫻花蝦 2湯匙 (optional)

蒜蓉汁:
蒜蓉 1湯匙
雞粉 1/4 茶匙
鹽 1/4茶匙
糖 1/2茶匙，
熟油 2湯匙

做法:
1) 荷葉洗一洗之後，放入熱水中加鹽灼一灼變軟，整乾後鋪在蒸籠上備用
2) 蒜蓉汁材料攪勻備用
3) 雞蛋打發好再加1/4茶匙鹽在白飯中，攪勻！大火熱鑊下油，把已混入蛋汁的飯倒在中間等30秒，先開始不斷炒和推！千其唔好壓！要有耐性！慢慢炒就會等到乾身同粒粒分明！炒好後將飯倒在荷葉上！
4) 鮑魚用牙刷刷乾淨！之後放入熱水煮30秒！再拿起沖凍水，用匙羹去鮑魚殼！之後去膽、腸和咀，再輕力擦一擦！
5) 鮑魚放在飯上，在鮑魚上淋上蒜汁，蓋上荷葉，可用牙籤固定，再蓋上蒸籠！滾水大火蒸6分鐘，蒸好之後再撒上蔥花和用油煎過的櫻花蝦！如果鐘意可淋上甜豉油！

#betiskitchen中式 #betiskitchen海鮮

滑滑海南雞飯中式食譜

29 五月, 2022粥粉麵飯/火鍋、雞、家常菜、中式發表留言

上次食咗個好好食嘅海南雞飯外賣，引發起我自己整😆其實上次整已經係三年前！日日都有太多餸想煮，成日諗唔起呢個😎今次整得超級滑！主要秘訣都係個樣，要用浸焗方法去煮熟隻雞！煮亦都一定要用細火！煮好之後要浸凍水，雞皮就會好脆身，等到隻雞降溫同表面乾身先開始切！自己整雖然有點煩，但係整到一隻滑雞充滿滿足感😜♥️🥰

▶️斑蘭葉必定要打上結，味道才會特別容易滲出來！
▶️切雞時盡量確保拿刀的手不要接觸雞塊，否則隻手會變得好油，拿不穩把刀😂切雞去骨可以參考YouTube一些教學片段😜

材料:
✨海南雞✨
雞 1隻
香茅 4支
斑蘭葉 4片
乾蔥 6粒 (去皮)
南薑 2塊
黃薑粉 1茶匙
冰塊適量
水適量

✨雞油飯✨
白米 1.5米杯
煮過雞的湯 1.5米杯
斑蘭葉 2片
香茅 1支
蒜 4瓣 (拍扁)
南薑 2塊
乾蔥 2粒 (切半)
雞脂肪/油適量

✨辣椒醬✨
兩條指天椒、一湯匙蒜蓉和一茶匙薑蓉弄碎，然後加入一個青檸汁

✨薑蓉✨
2湯匙薑蓉、1/2茶匙五香粉、1/2茶匙鹽和1/4茶匙糖攪拌均勻，然後倒入兩湯匙滾油

✨甜豉油✨
2湯匙老抽、2茶匙生抽和1湯匙糖細火煮至糖溶化

海南雞做法:
1) 全雞洗淨，先將多餘的雞脂肪切出，留起備用，切去雞腳，把雞身的內臟徹底清走，雞頸開一個洞
2)香茅輕拍後切段，班蘭葉打結，黃薑粉加少少水攪拌均勻
3) 除雞以外，所有材料加入水中煲滾後繼續煲5分鐘，水的份量要足夠蓋過全隻雞
4) 把雞放入水內5秒，拿起，再放入，重複3次。此動作是想熱水從雞頸流入雞身，令體肉都受熱均勻
5) 細火上蓋煮6分鐘，然後熄火繼續上蓋浸40分鐘，煮雞水留起煲飯用
6) 可用竹籤在雞腿位插入測試熟度，沒有血水滲出便代表已熟，然後把雞放在冰水中15分鐘，拿起讓雞皮風乾
7) 之後斬件及去骨即成

雞油飯做法:
1) 燒紅鑊，轉小火下雞脂肪榨出油，把脂肪拿走，加入其餘所有材料炒勻
2) 將炒過的材料放入飯煲，再下一比一的煲過雞的水作煲飯用，照一般電飯煲程序煲飯即成

#betiskitchen雞 #betiskitchen中式

櫻花蝦臘腸煲仔飯黄金飯焦技巧成功率高中式食譜

9 二月, 2022煲仔菜、粥粉麵飯/火鍋、豬、中式發表留言

今次想主打講飯焦！頭幾次煮建議用簡單啲嘅材料如臘腸、臘肉或潤腸等！如果整雞或者肉餅，因為會出水，亦會怕食材煮得太熟，會更難控制飯焦的成功率😗今次用咗傳統煲仔飯瓦煲！其實本身冇諗住買，因為屋企已經有太多煲😂不過街市雜貨店見到$28實在太平😅雖然唔耐用，但係好有風味，推薦♥️👦🏻投訴話個煲太細個，佢可以食2煲😆the best claypot rice from myself ever🖤🥸Cooking video on my instagram.

事先聲明，飯焦好視乎爐頭！未必一次成功！但整幾次一定掂❗️
▶️ 飯焦原理就好似用油煎米餅，有油而飯又煮到乾身，再大火少少就做到
▶️ 但秘訣就係點樣唔好太大火煮到黑哂，靠聞下個味同聽下聲，當然仲有經驗！如果聞到有燶味就係有問題，要收手細火啲😂
▶️個煲蓋唔好成日開嚟開去！後期要將個煲打斜，不同方向對住個火煮，咁就可以連個邊都有飯焦！
▶️我無浸米，洗一洗就煮，洗完米一定要盡量整乾水先！如果唔係水份就會唔啱比例！米用泰國米最易煮到乾身粒粒分明，我用泰國金鳳口感煙韌♥️
.
.
材料: (2人用)
臘腸 2條
櫻花蝦 30g
米 2米杯
水 2米杯 (1:1 比例)
甜豉油適量
蔥花適量

做法:
1. 鍋底抹1茶匙油，米洗淨後加入同等份量的水，蓋上鍋蓋以中火煮至鍋蓋緣有蒸汽冒出，再轉細火繼續煮約10分鐘至收水，之後放上臘腸、繼續小火煮10分鐘
2. 期間可以炒香櫻花蝦備用
3. 向煲邊圍圈倒上1湯匙油！火力轉中火！將個煲打斜向不同方位煮1-2分鐘左右(總共6分鐘)！應該會聽到節節聲同聞到香味！關火！把臘腸取出，切粒，之後和櫻花蝦一起放返入個煲到，冚蓋焗3-5分鐘，加上蔥花和豉油即成！(如果呢一刻撩個邊都係無飯焦就落多少少油繼續重複煮)

#betiskitchen中式 #betiskitchen豬

超鮮甜無水卜卜蜆鍋中式食譜

27 一月, 20229 八月, 2022簡易主菜、粥粉麵飯/火鍋、蜆貝和其他、家常菜、海鮮、中式發表留言

超鮮甜無水煮卜卜蜆鍋🇲🇴𝒞𝓁𝒶𝓂𝓈 𝓅𝑜𝓉
.
.
30秒學識整🫢15mins done! 超級簡單超級好食！最後個圖係一滴水都冇落過嘅效果，充滿鮮味，全部都係蜆和蔬菜的精華😜放向底的白蘿蔔和娃娃菜吸收晒！LC Buffet 每次整”無水煮”都大成功😎如果無可試下用淺身煲，一定要淺身有蓋，才可令蒸氣回流入煲底做到出水效果！如果都無就加100ml水去煮！今次隻沙白超級肥美💖$40斤！完全無沙！

.
.
▶️買水份高啲的白蘿蔔鋪底！就可以做到無水煮效果！如果真係驚唔夠可以落少少水！

▶️沙白/白蜆比較合適！新鮮度好重要！一定唔可以係死蜆，否則會有臭味同不能吐沙🫣我亦會觀察養蜆的水是否清澈，同最好在買開而可靠的魚檔多數唔會出事😎
.
.
材料:
蜆 1-1.5斤
白蘿蔔半條
娃娃菜 2棵
蒜蓉 2湯匙
蔥花 2湯匙
蠔油 1湯匙
麻油 1茶匙

做法:
1) 蜆放鹽水浸1小時吐沙，洗淨備用
2) 白蘿蔔去皮切粗條，娃娃菜切去根部，平均鋪在鍋底，再把蜆排好，可以先排外圍，再由外至內排好
3) 表面灑上其他材料，上蓋，中火煮6-8分鐘，或蜆開口即成

#betiskitchen中式 #betiskitchen海鮮

花膠臘腸鮑汁煲仔飯中式食譜

23 十二月, 2021煲仔菜、粥粉麵飯/火鍋、魚、中式發表留言

超級好食！花膠、臘腸再加煎過嘅瑤柱絲！Perfect Match! 飯焦好正💖花膠我去鴨脷洲大街買，臘腸用咗安記，再加隻日本蛋！呢個煲仔飯我自己諗出嚟嘅配搭，出面街都冇食過😗Inspired by myself🙂🙂🙂野生鮑魚汁係之前朋友向澳洲送俾我😭向香港我都未搵到！呢個飯真係好好食！5分鐘清哂😆💞

▶️如果煮到最後都覺得冇飯焦，可以試吓細火繼續煮5分鐘再焗5分鐘！飯焦呢樣嘢，真係好睇每個屋企嘅爐頭🥲好難一概而論🔥
▶️無鮑魚汁可以用蠔油代替
▶️菜心分開煮最後先放入去會冇咁容易變老
▶️發花膠details可睇返我之前的post！向我個blog到search💖

材料: (2人用)
花膠 1大塊/ 2-3條
米 2米杯
水 2米杯
鮑魚汁 1茶匙
瑤柱 2大粒
臘腸 2條
蛋 1隻
菜心 2條
甜豉油適量
油 1茶匙

花膠調味料:
蔥 2條
蠔油/ 鮑汁 1湯匙
雞湯 150ml
糖 1茶匙
老抽 1湯匙

做法:
1) 花膠浸1晚，之後用薑加小小米酒，煮一煲滾水再放入花膠，蓋上煲蓋，中火滾約3分鐘左右關火，花膠繼續蓋上蓋浸半日！
2) 瑤柱浸淋之後用油煎香，臘腸放入滾水煮3分鐘，切片備用，菜心用滾水煮熟
3) 花膠發好後，切粗條，煲中下油爆香蒜頭和蔥，快手下花膠輕炒後下雞湯和其他調味料，轉小火炆煮20分鐘
4) 鍋底抹1茶匙油，米洗淨後加入同等份量的水，再加多1茶匙鮑汁攪拌一下，蓋上鍋蓋以中火煮至鍋蓋緣有蒸汽冒出，再轉小火繼續煮約10分鐘至收水，之後放上臘腸、花膠、瑤柱碎，繼續煮5分鐘，再加入雞蛋煮多3分鐘，放上菜心，倒上甜豉油即成

⭐️如果想有飯焦可以最後轉中細火煮多5分鐘再熄火焗5分鐘⭐️

蟹粉花膠撈麵中式食譜

21 十一月, 2021粥粉麵飯/火鍋、蟹、海鮮、中式發表留言

上年整過蟹粉粉皮，今年試另一樣🍂仲記得前年有咗👶🏻！無得食又好想食😅今次用咗6隻大閘蟹🦀5.5-6両左右一隻！多謝👦🏻幫我拆蟹肉蟹羔🧡上年向蘇淅會食過💞今年憑記憶再整返同一個菜😆不過佢係用粗麵！我個人鐘意用幼麵多啲！蟹黃汁十分掛身！但係真係好肥🐷要努力跑返多幾次🙈蟹粉我覺得自制都係一個樂趣，上海食品店買到嘅蟹粉唔平，始終成本高又要好多人手😬

⭐️蟹粉撈面⭐️
材料:
大閘蟹 6隻 (6両)
紫蘇葉 6張

▶️大閘蟹放上紫蘇葉蒸好之後拆肉拆羔

材料: (2人用)
蟹粉 200g
麵 2個

薑蓉 1湯匙
油 3湯匙
雞粉 1茶匙
紹興酒 1茶匙
鎮江醋 1茶匙
鹽少許
胡椒粉少許
蔥花適量

做法:
1) 麵加水煮至軟身，隔走水份！留少少煮麵水備用！
2) 熱鍋下油，下薑蓉爆香，再下蟹粉炒2分鐘至蟹油出，再加入調味料再煮多2分鐘便可加入麵拌勻，再加上蔥花和煮好的花膠即成

⭐️花膠⭐️

花膠 1塊
蒜頭 2粒
蔥 2條
蠔油/ 鮑汁 1湯匙
雞湯 200ml
糖 1茶匙
老抽 1湯匙

做法:
1) 花膠浸1晚，之後用薑加小小米酒，煮一煲滾水再放入花膠，蓋上煲蓋，中火滾約3分鐘左右關火，花膠繼續蓋上蓋浸半日左右就會發到好大！一開始煮嗰陣會縮水㗎！唔好嚇親！之後浸就會變返大！
2)花膠發好後，煲中下油爆香蒜頭和蔥，快手下花膠輕炒後下雞湯和其他調味料，轉小火炆煮15-20分鐘，之後切粗條即成

#betiskitchen中式 #betiskitchen海鮮

蕃茄芝士焗豬扒飯中式食譜

16 九月, 2021粥粉麵飯/火鍋、豬、中式發表留言

<改良版> 港式美食！買咗來自澳洲的 @riverviewfarms_hongkong 豬扒！肉質好Juicy同好鬆軟！我最憎食硬嘅豬扒🤣今次我完全冇出動過鬆肉錘或刀背拍鬆！就咁煎完出嚟已經好滑！一啲都唔會鞋😜😜Highly recommended! 而家向 @hkgreendotdot 做緊 $100 2件優惠！好抵食！去到8月24日咋❤️❤️蕃茄用咗意大利蕃茄再配日本煎蛋🧡💛

▶️豬扒鬆軟方法:
⭐️加蛋白和生粉去醃！唔好加太多鹽去醃要用豉油！
⭐️醃之前用鬆肉錘或刀背拍鬆！
⭐️一開始煎要用大火
.
.
材料:
豬扒 250g
生粉 2湯匙
洋蔥半個
蕃茄 2個
水 200ml
茄汁 4湯匙
糖 1湯匙
鹽 1/2茶匙
Mozzarella芝士碎適量
煎太陽蛋 1隻 (optional)

豬扒醃料:
蛋白半隻
生抽 1茶匙
胡椒粉 1/4茶匙
糖 1/2茶匙
鹽 1/2茶匙
生粉 1湯匙
水 1湯匙

炒飯:
冷飯 2大碗
雞蛋 1隻
鹽 1/4茶匙

做法:
1) 豬扒醃料攪拌好，豬扒用刀背或鬆肉錘輕輕拍鬆，加入醃料醃至少半小時
2) 蕃茄切角和洋蔥切粗條備用
3) 把蛋打好，倒入白飯中攪拌均勻，熱鍋下1湯匙油，大火加入飯，不斷用鑊鏟推啲飯，(約要5-8分鐘) 直到飯炒到乾身和粒粒分明，加少許鹽備用
4) 豬扒醃好後，沾上輕薄的生粉，熱鍋下油，大火把豬扒煎至兩面金黃，拿出備用
5) 同一個鍋中下油，加入洋蔥炒香，再加入蕃茄炒2分鐘，然後倒入茄汁和水，再加入鹽和糖，中火煮約5-8分鐘至汁濃即成
6) 焗盤先鋪上飯，放上豬扒(可先切粗條再放入)，再倒入煮好的蕃茄汁，表面放芝士，180c焗10分鐘即成！

#betiskitchen中式
 #betiskitchen豬

高湯象拔蚌中式食譜

10 八月, 2021粥粉麵飯/火鍋、蜆貝和其他、海鮮、中式發表留言

2星期前煮🥺上個星期因為榮貓出咗事無post到😞好彩而家食返嘢又好似睇得返少少！繼續努力！

向街市買了一條象拔蚌自己開！簡單用個木魚昆布高湯煮一煮嚟食！再沾少少辣豉油！so good💕💙用木魚碎加一條昆布煮個湯底就OK!

自己開象拔蚌其實好易架咋！首先向二邊切一切，令到肉離殼先！把肉取出，切走個膽！準備熱水，把洗乾淨的象拔蚌放進去15秒後取出！就好容易整走個皮！把象拔蚌放在砧板上，中間切開，但唔好切斷！之後就可以切片啦😝💙 (去YouTube 睇下片lol，無想象中咁難)

#betiskitchen中式 #betiskitchen海鮮 #betiskitchen火鍋

粟米忌廉肉粒飯中式食譜

10 七月, 2021粥粉麵飯/火鍋、豬、家常菜、中式發表留言

<白粟的愛> 拖了一個星期的食譜🥲碟頭飯方便快捷，再加碟烚菜😆簡簡單單就可以餵飽屋企的兩位大少💕其實自己整白汁好簡單，今次成個食譜都冇用到罐頭忌廉粟米🤪白粟米用了北海道的白粟米🤍肉粒用咗西班牙黑毛豬肉粒，超方便切都唔使切lol

▶️豬肉可買梅頭切粒，肉質較淋
▶️白粟米唔一定要用日本，而家好多街市菜檔都有白粟米賣🤍

材料:
飯 2碗
豬肉粒 200g
白粟米 1條
黃色粟米粒 4湯匙
牛油 25g
麵粉 25g
水/雞湯 300ml
牛奶 50ml
糖 1茶匙
鹽 1/2茶匙

豬肉醃料:
生抽 2茶匙
糖 1/2茶匙
生粉 1/2茶匙
油 1茶匙

做法:
1) 豬肉切粒，加醃料醃15分鐘，之後熱鑊下油，豬肉粒加入炒至八成熟，盛起備用
2) 粟米切出來，黃色粟米粒加適量水份煮熟，隔走水份，再放入3湯匙水放入攪拌器打碎，成粟米蓉 (可用罐頭忌廉粟米取代)
3) 熱鑊下牛油，煮溶後加入白粟米粒炒香，再加入麵粉攪拌均勻至無粉粒，全程要用細火！
4) 之後加入雞湯/水和粟米溶，維持攪拌，再倒入牛奶！煮至汁濃便成忌廉粟米汁！再倒入肉粒，煮熟，之後加入糖和鹽調味，再配白飯食即成！

#betiskitchen中式 #betiskitchen豬