👵🏻‘s recipe again! 續上次咕嚕肉之後！另一個小時候的味道❤️同上次咕嚕肉一樣煮法！我覺得仲簡單啲！因為唔使醃肉同唔需要翻炸！🤣絕對絕對好味過出面食到嘅好多！呢個甜酸汁冇用到白醋！老人家話佢哋以前都係用酸梅/山楂同麥芽糖！麥芽糖就係帶出呢個閃令令色水既重要因素！如果冇可以用糖漿取代！蝦盡量買大隻少少！我今次用咗新鮮蝦！不過冰鮮都OK🧡❤️

▶️要整到蝦球形狀：蝦開邊要切深少少，大概切到2/3深度，沾完蛋漿和生粉之後要用手卷成一個圓餅！之後一放落油炸就會定型成蝦球形狀😙
▶️酸梅向街市雜貨店有！用茄膏顏色會靚過用茄汁！

材料:
中size蝦 12隻
青紅椒 各半個（切角）
罐頭菠蘿 2片 (切大粒)
蛋 1隻
生粉 半杯
油 400ml

醃料:
鹽 1/4茶匙
胡椒粉 1/4茶匙
生粉 1茶匙

甜酸汁:
水 80ml
麥芽糖 40ml
酸梅 2-3粒
檸檬汁 1茶匙
茄膏 1.5湯匙

做法:
1) 蝦去殼去腸，之後向蝦上身用刀切入2/3深度，開邊，但小心不要切到底，加入醃料攪拌均勻放入雪櫃備用
2) 甜酸汁: 酸梅去核壓碎，水加麥芽糖細火煮溶！再加入其他材料邊攪拌邊煮至濃身！可以試吓味！唔夠酸加多少少檸檬汁，唔夠甜加多少少糖！
3) 雪櫃取出蝦！加入一隻蛋攪拌均勻！油預熱好！炸之前一刻才每粒沾上生粉再要用手將蝦卷成圓餅狀！
4) 放入滾油內中火炸至熟透，取出隔油備用 (約2-3分鐘)
5) 燒熱少少油， 爆青紅椒，再加入菠蘿和炸過的蝦，再倒入甜酸汁炒至醬汁掛在蝦上即成

• 

• 

• 

• 

• 

• 

#betiskitchen中式#betiskitchen海鮮

👵🏻‘s recipe! 幾年前婆婆口述我記錄😬小時候的味道❤️好耐冇煮過呢個食譜！絕對絕對好味過出面食到嘅好多！呢個甜酸汁冇用到白醋！老人家話佢哋以前都係用酸梅/山楂同麥芽糖！麥芽糖就係帶出呢個閃令令色水既重要因素！如果冇可以用糖漿取代！豬肉一定要買豬腩排！我揀咗無骨方便好多！👦🏻話超好食，仲話整到有拔絲效果LOL😜😜

▶️炸豬肉過程就唔好偷懶！開油炸同一定要翻炸！(二次油炸) 咁先做到外脆內軟，將入面啲油迫晒出嚟😗
▶️酸梅向街市雜貨店有！用茄膏顏色會靚過用茄汁！

材料:
豬腩排 300g
青紅椒 各半個（切角）
罐頭菠蘿 2片 (切大粒)
蛋 1隻
生粉 半杯
油 400ml

醃料:
生抽 1湯匙
糖 1茶匙
胡椒粉 1/4茶匙
生粉 1茶匙

甜酸汁:
水 80ml
麥芽糖 40ml
酸梅 2-3粒
檸檬汁 1茶匙
茄膏 1.5湯匙

做法:
1) 豬腩排切大粒約1cm闊！加入醃料放入雪櫃醃約1小時！
2) 甜酸汁: 酸梅去核壓碎，水加麥芽糖細火煮溶！再加入其他材料邊攪拌邊煮至濃身！可以試吓味！唔夠酸加多少少檸檬汁，唔夠甜加多少少糖！
3) 雪櫃取出豬腩排！先加入一隻蛋攪拌均勻！油預熱好！炸之前一刻才每粒沾上生粉！
4) 放入滾油內中火炸至熟透，取出隔油備用 (約3分鐘)
5) 油轉大火，把炸過的肉再加入，翻炸1分鐘，拿起
6)燒熱少少油， 爆青紅椒，再加入菠蘿和炸過的肉，再倒入甜酸汁炒至醬汁掛在肉上即成

• 

• 

• 

• 

#betiskitchen中式
#betiskitchen豬

想買部蒸爐好耐！今次第一次用呢部2021年全新型號 @toshiba_lifestyle_hong_kong Q20 蒸焗爐 (MS2-TQ20SC)！選了這個鮮味十足的花雕花蟹蒸蛋白來為這個蒸焗爐開光🤍蟹和花雕的酒香十分夾，而且再加入了蒸蟹時的精華去蒸蛋白，用呢部蒸爐蒸出黎好滑熱力十分均勻！重點係機細易放！我屋企個廚房已經無位整嵌入式蒸爐🤣而且內籠實用，同時放到2層共4隻碟🤪所以呢部機好啱我用💕另外佢仲可以發酵麵團、消毒奶樽同消毒餐具！👶🏻👶🏻👶🏻性價比高真心推介😙

⭐️介紹下呢部機既特點⭐️
🧡58個功能/食譜，比舊型號多左DOUBLE
🧡獨立按鈕(蒸、焗、蒸焗功能一按就係，使用更加方便) ，仲有跟機貼中英文紙，可以更加清楚知道用緊咩功能
🧡有兒童鎖，唔使驚小朋友唔小心開咗
🧡多功能(蒸、焗、炸、燉、發酵麵團、發酵乳酪) 性價比高
🧡推廣期內買多送一套蒸焗盤(價值$270)
🧡4個清潔消毒(爐腔清潔、爐腔除味、餐具消毒、奶樽消毒)
.
.
▶️蛋白和水份比例1:1就ok
.
.
材料:
花蟹 1隻 (1斤左右)
蛋白 4隻 (約150ml)
花雕酒 2湯匙
牛奶 75ml
水/ 蒸蟹水 75ml
鹽 1/4茶匙
蒸魚豉油 適量
滾油 2湯匙
芫荽 適量
葱花 適量

做法:
1. 拆開蟹蓋後去蟹胃去腮等，洗淨，斬件後，可在蟹鉗上用刀背拍幾下，瀝乾水份，加入1湯匙花雕酒伴勻
2. 放入Toshiba Q20蒸爐用大火快蒸(自動功能31)，調校至5分鐘蒸至半熟，要留著碟底的蟹汁
3. 蛋白、牛奶、1湯匙花雕酒、蒸過蟹的水和鹽拌勻再過篩備用
4. 碟上先倒入蛋白液，再把蟹放上，碟蒸一定要加蓋或錫紙，避免倒汗水沾上蛋面
5. 用純蒸功能，蒸10分鐘
6. 取出，可倒上蔥花和芫荽，再淋上滾油和蒸魚豉油即成

• 

• 

• 

• 

• 

• 

#betiskitchen中式#betiskitchen海鮮#ToshibaLifestyleHongKong
#東芝Q20蒸氣焗爐
#蒸氣焗爐

盛夏是荷葉當做季節，一心諗住搵新鮮荷葉，搵咗成個街市都冇🥲放棄🥱用乾荷葉同樣好食！最理想係入面先包一張新鮮荷葉，出面再包一張張乾的☘️乾呢張超平$1一張😅荷葉嘅清香向蒸嘅時候滲入蝦身，新鮮野生海蝦簡單食先至食到佢嘅鮮味💙爆羔十分鮮甜，休漁期貴啲都✅💕

▶️一定要猛火先放入去蒸，否則好易梅
.
.
材料:
新鮮蝦 半斤
荷葉 2張

1) 熱水把乾荷葉至軟身/新鮮荷葉熱水煮3分鐘，再瀝乾備用
2) 蝦可以洗淨直接放在荷葉上！鍾意可以先去鬚去腳去腸！荷葉面向上！再包多一層！再攞竹籤包住！
3) 大火蒸6至8分鐘！可以配辣豉油食❤️

• 

• 

• 

• 

#betiskitchen中式#betiskitchen海鮮

<白粟的愛> 拖了一個星期的食譜🥲碟頭飯方便快捷，再加碟烚菜😆簡簡單單就可以餵飽屋企的兩位大少💕其實自己整白汁好簡單，今次成個食譜都冇用到罐頭忌廉粟米🤪白粟米用了北海道的白粟米🤍肉粒用咗西班牙黑毛豬肉粒，超方便切都唔使切lol

▶️豬肉可買梅頭切粒，肉質較淋
▶️白粟米唔一定要用日本，而家好多街市菜檔都有白粟米賣🤍

材料:
飯 2碗
豬肉粒 200g
白粟米 1條
黃色粟米粒 4湯匙
牛油 25g
麵粉 25g
水/雞湯 300ml
牛奶 50ml
糖 1茶匙
鹽 1/2茶匙

豬肉醃料:
生抽 2茶匙
糖 1/2茶匙
生粉 1/2茶匙
油 1茶匙

做法:
1) 豬肉切粒，加醃料醃15分鐘，之後熱鑊下油，豬肉粒加入炒至八成熟，盛起備用
2) 粟米切出來，黃色粟米粒加適量水份煮熟，隔走水份，再放入3湯匙水放入攪拌器打碎，成粟米蓉 (可用罐頭忌廉粟米取代)
3) 熱鑊下牛油，煮溶後加入白粟米粒炒香，再加入麵粉攪拌均勻至無粉粒，全程要用細火！
4) 之後加入雞湯/水和粟米溶，維持攪拌，再倒入牛奶！煮至汁濃便成忌廉粟米汁！再倒入肉粒，煮熟，之後加入糖和鹽調味，再配白飯食即成！

#betiskitchen中式#betiskitchen豬

• 

• 

• 

• 

• 

• 

• 

• 

• 

• 

Simple cooking simple sharing🐠呢期都係簡單煮為主🥲一來想食得清淡啲一來無時間😌近期蒸過東星斑、珠星斑同金錢斑💙屋企2個人兄淨係鍾意食新鮮游水斑😥

▶️加幾條蔥向底，一斤左右大火蒸7-8分鐘，取出，倒走碟中嘅水，放上蔥花，淋上滾油，再倒上蒸魚豉油！
▶️兩斤以上可在魚鰭兩邊位切一刀會更易蒸熟
▶️魚夠新鮮絕對唔使落薑
▶️放蔥向底幫助蒸氣流通，可蒸均勻啲
▶️蒸魚豉油: 加1湯匙油爆香薑蔥，加入2湯匙老抽、1湯匙生抽、1.5湯匙糖和2湯匙水，煮滾即成

#betiskitchen中式
#betiskitchen魚

• 

• 

附video in my Instagram! Super easy💛10分鐘搞掂！今次用了蘭王蛋、老爺自製叉燒加北海道牛乳❤️所以蛋色好橙黃🥸竟然向Aeon買到蘭王蛋🥳呢個叉燒炒蛋煮到半生熟係最好食！所以最好用可以生食用嘅雞蛋喔🥚話說呢個餸都係for快食用，叉燒買現成可以啦😗
.
.
點先炒到滑蛋？
➡️炒時油要夠熱才不黏鍋
➡️油要夠多蛋才不老保持嫩滑
➡️見底部蛋汁開始凝固就手快地用鑊鏟由底鏟上面
➡️快手快手快手，蛋未完全凝固時熄火！用餘溫再炒蛋！
.
.
材料:
飯 2碗
叉燒 100-150g
雞蛋 4個
牛奶 50ml
蔥粒 少許
鹽 1/2茶匙
甜豉油

做法:
1) 叉燒切片
2) 燒熱油鑊，用中火炒一炒香叉燒！洗返好隻鑊先攞嚟炒蛋！
3) 蛋、牛奶、鹽和蒽粒攪拌均勻，再加入煎香了的叉燒！
4) 大火加2湯匙油在鑊中，等到油好熱，倒進蛋汁和叉燒，關火利用餘溫再炒蛋，見底部蛋汁開始凝固就手快地用鑊鏟由底鏟上面，重覆炒多幾下後便成，免炒得太熟，最後加蔥粒和甜豉油，放在白飯上即成

#betiskitchen中式#betiskitchen蛋#betiskitchen豬

• 

• 

• 

• 

My comfort food 🥰 can’t think of what to cook recently 🙄 用了西班牙黑毛豬免治豬肉 x 大澳土魷 x 日本花菇💙簡單家常菜認真做😆 SO GOOD!

⭐️蒸肉餅鬆軟tips⭐️
▶️落生粉同咸蛋白！生粉本身可以鎖住肉汁同埋質感幼滑，蛋白就可以增加粘性
▶️舊肉嘅質素都好重要！如果成舊肉都係瘦肉落乜嘢都會實一實！肥瘦比例3:7 /4:6 左右！用梅頭肉就OK
▶️我覺得就咁用免治豬肉都OK，自己剁係會好食啲但係都麻煩啲😹如果要自己剁可以先切條再切粒先開始剁碎
▶️蒸最好攤薄大火蒸，我覺得攤薄係最好食，咁就唔會蒸過火而導致硬哂！我完全唔鍾意食肉餅山😅

材料:
免治豬肉 300g
土魷 2隻
冬菇 2粒
葱花

生粉 2茶匙
生抽 1.5茶匙
鹽 1/2 茶匙
水 2-3湯匙
糖 1/2茶匙
麻油 1茶匙
胡椒粉 1/4 茶匙
咸蛋白 1/3隻

做法:
1) 土魷和冬菇浸軟後切小粒
2) 豬肉加入所有調味料(除咸蛋白)向同一方向攪勻至黏身，最後加入咸蛋白攪勻，再加入土魷和冬菇，醃15分鐘
3) 把肉放在碟上，大火蒸10分鐘，最後再加上蔥花即成！鍾意重味啲可以再加上熟油和豉油

#betiskitchen中式#betiskitchen豬

• 

• 

• 

• 

• 

• 

My dinner bao bao♥️配刈包食好好味😋急凍刈包向台灣食物品店購入！就咁蒸返熱就得😍 第一次整諗住健康啲冇用pork belly，但真係唔好食😂 所以整第二次🤓 豬腩肉一定要出水先再炸，但係我只係用半煎炸，話說覺得太危險唔想比油彈😆炸過再蒸會鬆化好多！

材料：
五花腩 ~300g
甜梅菜 2棵

炒梅菜:
糖 1湯匙
生抽 1茶匙
老抽 1湯匙
米酒 1茶匙

豬腩肉醃料:
乾蔥 1湯匙
蔥花 1/2湯匙
蒜蓉 1湯匙
柱候醬 1湯匙
生抽 1湯匙
老抽 1/2湯匙
米酒 1湯匙
糖 1茶匙
鹽 1/4茶匙
水 50ml

做法:
1) 梅菜浸15分鐘再用水洗淨！然後瀝乾再切去頭尾部份，再切細粒！熱鍋下油，加入梅菜炒香，再倒入炒梅菜料，炒至吸收汁料，拿起備用
2) 五花腩凍水落鍋，之後煲滾後繼續煮15分鐘，拿起再用叉刺孔以免之後炸會爆皮！
3) 用1-2湯匙老抽平均地塗上五花腩肉，上色！熱鍋下油，將有皮個面向底，半煎炸脆個皮，再轉其他邊每邊都半煎炸一下！拿起備用！小心彈油丫😅
4) 把五花腩放涼後切厚件！唔好切得太薄否則唔好食！加入醃料攪拌均勻！
5) 蒸碟底部鋪上1/3梅菜，再倒上少許醃料汁，鋪上五花肉，再鋪上1/3梅菜，再五花肉，鋪上餘下的梅菜，和倒上醃料汁
6) 再中火蒸1-1.5小時左右即成 (淋就可關火)

#betiskitchen中式#betiskitchen豬

• 

• 

• 

• 

• 

簡單食譜💙冇咩心情煮飯嘅日子，簡簡單單又一餐⭐️ 我會一半用雞湯，一半用浸過瑤柱同蝦乾嘅水，唔落鹽！唔記得影舀蛋嘅video😌好滑💛

蒸滑蛋不失敗秘訣 
🔸蛋:水 比例一定係 1:2 喔
🔸一定要用保鮮紙或鍚紙蓋住蒸
🔸蛋液過篩 盡量戮穿蛋液上的氣泡

材料:
雞蛋 2隻
粉絲 半包
大蝦乾 8條
瑤柱 6粒
浸蝦乾瑤柱水/雞湯約240ml (1份蛋汁:2份水)
葱花 1湯匙

做法:
1) 大蝦乾和瑤柱浸1小時到軟，瑤柱撕開，粉絲浸15分鐘，之後滾水煮30秒，拿起瀝乾水份和剪一剪
2) 可以留 1/4的大蝦乾和瑤柱，用油煎香之後放面用
3) 雞蛋打勻，不用打發太耐，以免起泡，加入水/雞湯拌勻，用隔篩濾去雜質及氣泡
4) 蒸碟慢慢倒入蛋汁，再放入粉絲、 大蝦乾和瑤柱！碗上鋪上錫紙，中大火隔水蒸12分鐘，灑上煎過的大蝦乾和瑤柱、蔥花淋上豉油即成

#betiskitchen中式#betiskitchen蛋

• 

• 

• 

• 

• 

• 

•